Бутунжаҳон бокс ассоциацияси (WBA) ярим ўрта вазн тоифаси вакиллари (-69,85 кг) Исроил Мадримов (8-0, 6 КО) ва Мишель Соро (35-3-1, 24 КО) ўртасида чемпионлик камарига мажбурий даъвогар мақоми учун реванш жанги ўтказилишини эълон қилди.

Қайд этилишича, 2021 йилнинг 17 декабрь куни Тошкентда бўлиб ўтган биринчи жанг натижаси сақланиб қолинади. 

Ўша жангнинг 9-раундида Мадримов гонг овозини эшитмаган ва рақибга бир неча зарбалар йўллаши натижасида техник нокаут қайд этилган эди. Бундан норози бўлган Соро жамоаси ташкилотга реванш берилишини сўраб мурожаат қилган. WBA эса Соро жамоасининг сўровини қабул қилди ва Мадримовга реванш жангида иштирок этиш мажбуриятини қўйди.

Маълум қилинишича, томонларга жанг бўйича музокараларни якунлаш учун 30 кун муҳлат белгиланди. Келишув амалга ошмаган тақдирда очиқ промоутерлик савдоси бўлиб ўтади.

Эслатиб ўтамиз, ушбу вазнда WBA Super камари айни дамда Жермелл Чарлога (34-1-1, 18 КО) тегишли ҳисобланади. Чарло WBА, WBC, IBF ва WBО чемпионлик унвонлари учун Браян Кастаньога (17-0-2) қарши реванш жангида иштирок этади. Мадримо-Соро беллашуви ғолиби эса WBA Super чемпионлик камари учун даъвогарга айланади.
 

• Бокс