Сабзавотлар ичида ранги ва фойдаси билан ажралиб турадиган сабзавот лавлагининг инсон организми учун фойдалари ҳақида танишиб чиқинг.

Хом лавлагининг қандай фойдали томонлари бор?
Паст калория таркибига эга бўлган хом лавлаги кўп миқдорда клетчаткага бой. Бу ич қотишининг олдини олади.

Лавлаги ичак микрофлорасини фойдали моддалар билан озиқлантиради ва дисбактериозига қарши курашишга ёрдам беради.

Лавлаги жигарда ёғ инфильтрациясини камайтирадиган моддалар туфайли ёғ алмашинувига ижобий таъсир кўрсатади ва шу билан вазн камайтиришга ҳам ҳисса қўшади. Аммо бу вазн йўқотиш учун кўпроқ қўшимча маҳсулот сифатида хизмат қилади.

Лавлаги темир ва магнийга бой. Ҳозирги вақтда ҳамма ҳам керакли миқдордаги темирни олиш учун етарли даражада гўшт истеъмол қилмайди. Вегетарианлар эса умуман гўшт емайди. Шунинг учун лавлаги ёрдамида улар темир моддасини олиши мумкин. Магний асаб тизимининг ишлаши, атеросклероз ва гипертониянинг олдини олиш учун муҳим элемент ҳисобланади.

Лавлагида қон айланиш системасининг меъёрда ишлаши учун ажралмас бўлган фолий кислотаси мавжуд. Бундан ташқари, фолий кислотаси ҳомиладор аёллар учун зарурдир.

Хом лавлаги саратон ҳужайраларига қарши курашда энг кучли моддалардан бири бўлган бетаинни ўз ичига олади.

Лавлаги паст калорияли таркиби билан ошқозонда катта ҳажм беради ва тўқлик ҳиссини келтириб чиқаради. Шу билан иштаҳани бўғади, овқатланишни камайтиради.

У қон томирларини кенгайтиришга ва босимни меъёрлаштиришга ёрдам берадиган антиоксидантларга бой.

Спортчилар учун мушак массасини шакллантиришда машқдан кейин лавлаги шарбати жуда фойдали.

Лавлагини қандай пишириш керак?
Лавлаги пиширилганда у ўзидаги бир қанча хусусиятларини йўқотади. Албатта, кўпчилик лавлагидан тайёрланган салатларни севиб истеъмол қилади. Афсуски, юқори ҳарорат таъсирида баъзи фойдали моддалар йўқолади, лекин ҳаммаси эмас. Клетчаткалар сақланиб қолади.

Лавлаги пиширишнинг энг яхши усуллари қайнатиш ва буғда ҳамда димлаб пиширишдир. Шунингдек, лавлагидан шарбат ҳам тайёрлаш мумкин. Аммо уни оч қоринга ичмаслик керак, чунки у ошқозонни безовта қилади.

Кимларга лавлаги истеъмоли тавсия этилмайди?
Лавлаги таркибидаги шакар тезда қонга сўрилади, натижада унинг кескин кўтарилиши кузатилади. Шунинг учун қандли диабет билан оғриганларга қайнатилган лавлаги тавсия этилмайди.

• саломатлик