“Green Climate Fund” Марказий Осиё, Жанубий Кавказ ва Покистондаги  тоғли ҳудудларда сув ва қишлоқ хўжалиги тизимларини яхшилаш учун 250 миллион доллар ажратди. Лойиҳа доирасида Ўзбекистон ҳам иштирок этади ва Осиё тараққиёт банки билан ҳамкорликда амалга оширилади. Банк бу ташаббус учун қўшимча равишда 3,25 миллиард доллар маблағ йўналтиради.

Дастурнинг асосий мақсади — тез эриётган музликлар таъсирида сув танқислиги ва иқлим ўзгаришига мослашишда қишлоқ хўжалигига ёрдам бериш. Лойиҳа доирасида сувни тежайдиган ирригация тизимларини жорий этиш, янги сув омборлари қуриш ва сув ресурсларини бошқаришни такомиллаштириш режалаштирилган.

Осиё тараққиёт банкининг қишлоқ хўжалиги ва табиатни муҳофаза қилиш бўйича директори Ясмин Сиддиқи таъкидлашича, “Музликлар тез эриши — минтақа учун энг катта хавфлардан бири. Бизга амалий ва илмий асосланган ечимлар керак. Ушбу дастур халқлар ҳаёти ва иқтисодий барқарорлиги учун узоқ муддатли таъсир кўрсатади”, — деди у.

Дастур Арманистон, Озарбайжон, Гуржистон, Қозоғистон, Қирғизистон, Покистон, Тожикистон, Туркманистон ва Ўзбекистонни қамраб олади. У Норин, Пянж, Кура ва Сват дарё ҳавзаларини ўз ичига олади ва 13 миллионга яқин одамнинг турмуш сифатига ижобий таъсир кўрсатиши кутилмоқда.

• Лойиҳа
• Markaziy Osiyo
• Muzliklar