Хиан Жиантонг-Ливерпул университети мутахассислари томонидан тадқиқот ўтказилганда, хитойлик олимлар ноодатий ҳолатга дуч келишди. Айрим микробларни антисептиклар ўлдира олмас экан ва бу микроорганизмлар антисептикларнинг таркибий қисми билан озиқланаётганини маълум қилишди.

Биологларнинг айтишича, шаҳарларда яшовчи микроблар эволюция жараёнини бошдан кечирмоқда. Шу йўл билан улар инсонлар микробларга қарши қўллаётган воситаларга қарши курашишга уринмоқда. Бугунги кунда уларни чекланган ресурсларга эга шаҳар шароитлари ҳам қўрқита олмайди.

Олимлар антисептикларга мослашган бактерия турларини аниқлади.Тадқиқотчилар бинолари кўп ҳудудларда микроблар учун озуқа моддалари етишмаслигини эслатди. Қолаверса, аҳоли ҳар доим уларни йўқ қиладиган воситалардан фойдаланади. Бу эса микробларни муҳитга мослашишга мажбур қилган.

Олимлар Ҳонконгдаги метро, турар жой бинолари, жамоат муассасалари ва инсон терисидан 738 та микроорганизм намуналарини текширди. Уларнинг деярли ярми фанга номаълум бўлиб чиқди. Мутахассислар илгари олимларга маълум бўлмаган 363 та штаммни аниқлади. Бу каби организмлар инсонлар терисида ва атроф-муҳитда яшайди. Уларнинг айримларида шаҳарлардаги саноат маҳсулотларини парчалаш учун зарур генлар бор. Улар бу маҳсулотлардан углерод ва энергия манбалари сифатида фойдаланади.

Ноодатий турлардан бири Candidatus phylum Eremiobacterota штамми эди. Илгари бу штамм фақат Антарктидада топилган. Микроблар тозалаш воситаларида мавжуд бўлган аммоний ионлари ёрдамида озиқланади. Бундан ташқари, улар кенг тарқалган дезинфексияловчи воситалар таркибидаги спиртни парчалаш қобилиятига эга.

Олимларнинг таъкидлашича, бундай штаммлар соғлиқ учун хавф туғдириши мумкин.Шунингдек, тадқиқотчилар 11 та Micrococcus luteus штаммларини аниқлади. Булар иммунитет тизими заифлашган одамларда ўлимга олиб келувчи инфекцияларни келтириб чиқариши мумкин.

Мутахассисларнинг таъкидлашича, шифохоналар бино ичидаги турли инфекцияларни қўзғатувчи патогенлар ўчоғи бўлиши хавфи бор. Улар, айниқса, реанимация бўлимларига жиддий хавф туғдиради.

• Фойдали
• Lifestyle
• Тиббиёт
• Янгилик
• antiseptik
• bakteriya
• саломатлик
• тадқиқот