АҚШ, Мексика ва Канада майдонларида бўлиб ўтадиган 2026-йилги футбол бўйича Жаҳон чемпионати тақвими ҳамда учрашувлар ўтказиладиган стадион номлари маълум бўлди. Унга кўра, Ўзбекистон терма жамоаси гуруҳ босқичидаги илк ўйинини Мексикада ўтказса, қолган икки турни АҚШдаги стадионларда ўтказади.

“Оқ бўрилар” илк турда Колумбияга қарши майдонга тушади. Бу учрашувга Мексика пойтахтидаги “Атстека” стадиони мезбонлик қилади. Иккинчи турда Криштиану Роналду бошчилигидаги Португалия билан ўйнайди. Мазкур беллашув АҚШдаги “НРГ” стадионида ўтади. Фабио Каннаваро жамоаси охирги турдаги учрашувни Атлантадаги “Мерседес Бенз” стадионда ўтказади.

1-тур. 17 июнь | Ўзбекистон - Колумбия (“Атстека” стадиони. Мехико).

2-тур. 23 июнь | Португалия - Ўзбекистон (“НРГ” стадиони. Ҳюстон).

3-тур. 27 июнь | Конго/Ямайка/Янги Каледония - Ўзбекистон (“Мерседес Бенз” стадиони, Атланта).

Эслатиб ўтамиз, 5 декабрь, жума куни Жаҳон чемпионати гуруҳ босқичига қуръа ташланди. Унга кўра, Ўзбекистон “К” гуруҳидан жой олди. Фабио Каннаваро бошчилигидаги жамоага Португалия, Колумбия ҳамда қитъалараро плей-офф ғолиби (Конго – Ямайка/Янги Каледония) рақиблик қилади.

• Футбол
• Жаҳон чемпионати
• Ўзбекистон