Германиянинг Берлин шаҳрида истиқомат қилувчи сураткаш Борис Эльдагсен нуфузли халқаро танлов – “Sony World Photography Award” ғолиби деб топилган бўлса-да мукофотдан воз кечишга қарор қилди ва у томонидан танловга тақдим этилган “сурат” аслида нейротармоқ томонидан яратилганини тан олди.

Маълум бўлишича, Эльдагсен суратни танловда иштирок этиш учун 2022 йилнинг декабрь ойида тақдим этган. Оқ-қора рангда ишланган суратда икки авлод вакили бўлмиш аёлларни кўриш мумкин. Сураткаш жорий йилнинг 2 март куни ўзининг шахсий сайтида танловда ғолиб бўлганини маълум қилган ва мукофотни олишдан бош тортган. Сураткаш унинг мазкур тажрибаси жамоатчилик эътиборини ушбу масалага қаратиш учун амалга оширилганини айтиб ўтган.

“Сунъий интеллект томонидан яратилган суратлар ҳақиқий асарлар билан рақобатлаша олмаслиги керак, булар бутунлай бошқа-бошқа нарсалар. Биз айнан нималарни ҳақиқий сурат деб ҳисоблаш ва ҳисобламаслик масаласида жиддий баҳсга муҳтожмиз”, – деб ёзган Эльдагсен.

Танлов ташкилотчилари эса суратнинг сунъий интеллект томонидан яратилганини билишмаган. Эльдагсен ташкилотчиларга суратга алоқадор маълумотларнинг ҳаммасини ҳам тақдим этмаган.  

• Fotografiya
• Маданият
• қизиқарли
• танлов