Туркий халқларнинг асрлар давомида сақланиб келаётган дўстлиги ва ҳамжиҳатлиги муштарак тарих, тил, маданият ҳамда қадриятлар билан чамбарчас боғлиқ. Бугунги глобаллашув даврида ҳам ушбу ришталар нафақат сақланиб қолмоқда, балки янги мазмун билан бойиб, янада мустаҳкамланиб бормоқда.

Андижоннинг 2026 йилда туркий дунёнинг маданият пойтахти деб эълон қилиниши нафақат вилоят, балки бутун Ўзбекистоннинг халқаро маданий майдондаги нуфузини оширишга хизмат қилмоқда. Мазкур нуфузли мақом доирасида ташкил этилаётган тадбирлар туркий халқлар ўртасидаги тарихий, маданий ва маънавий ришталарни янада мустаҳкамлашга қаратилгани билан аҳамиятлидир.

Хусусан, 25 июнь куни Фарғона вилоятидаги Ислом Каримов номидаги театр ва концерт саройида бўлиб ўтган “Водийдан Турон садоси” халқаро гала-концерти ана шундай йирик маданий тадбирлардан бири бўлди. Тадбир “Андижон – 2026 йилда туркий дунёнинг маданият пойтахти” дастурининг тантанали очилиш маросими доирасида ташкил этилди.

Гала-концертда Ўзбекистон, Озарбайжон, Қозоғистон, Қирғизистон, Туркманистон ва Туркиядан ташриф буюрган санъаткорлар, фольклор жамоалари ҳамда рақс ансамбллари иштирок этиб, туркий халқларнинг бой маданий мероси, муштарак қадриятлари ва санъатдаги яқинлигини намоён этди.

ТУРКСОЙ Бош котиби ўринбосари Сайит Юсуф сўзга чиқиб, туркий халқларни бирлаштириб турувчи умумий тарих, тил ва маданият халқлар ўртасидаги дўстлик ҳамда ҳамжиҳатликни мустаҳкамлашда муҳим ўрин тутишини таъкидлади. Унинг қайд этишича, бундай маданий лойиҳалар нафақат санъатни тарғиб қилади, балки қардош халқлар ўртасидаги ўзаро ҳамкорликни янги босқичга олиб чиқади.

Тадбир Ботир Эргашевнинг “Туркийлар” шеъри асосида саҳналаштирилган бадиий чиқиш билан бошланди. Шундан сўнг турли мамлакатлардан келган фольклор ва рақс жамоалари иштирокидаги мусиқий-хореографик композициялар томошабинларга байрамона кайфият улашди.

Ўзбек миллий санъатининг ёрқин намуналари билан бир қаторда, қардош давлатлар ижодкорларининг чиқишлари ҳам намойиш этилди. Қозоғистоннинг “Саукеле”, Туркманистоннинг “Мелегуш” ва “Кушдебти”, Туркиянинг “Халай” ҳамда “Карадениз” рақслари, шунингдек, турли давлатлар фольклор жамоаларининг чиқишлари томошабинларда катта таассурот қолдирди.

“Андижон – 2026” лойиҳаси нафақат маданий алмашинувни кенгайтириш, балки туризм салоҳиятини ошириш, ҳудуднинг халқаро имижини мустаҳкамлаш ва Ўзбекистоннинг бой маданий меросини жаҳон миқёсида тарғиб этишда ҳам муҳим омил бўлиб хизмат қилади.