Кўплаб блокбастер ва драмалардаги роллари туфайли машҳур бўлган америкалик актёр ва продюсер Том Круз 3-июль куни 62 ёшга тўлди. Круз касбига содиқлиги билан танилган ва у хавфли трюкларни дублёрларсиз ўзи бажаради. Ўзининг узоқ фаолияти давомида у “Оскар”га номзод ва “Олтин глобус” ғолиби сифатида яна кўплаб мукофотларга сазовор бўлди.

Том Круз Нью Йоркнинг Сиракюс шаҳрида муҳандис ва ўқитувчи оиласида туғилган. У актёрликка илк қадамларини 10 ёшида мактаб театр клубида қўйган. Болалигида тишлари қийшиқ, ўзига ишонмайдиган йигит бўлиб, турли мультфильм ва кино қаҳрамонларига қизиқар, уларнинг овозига моҳирона тақлид қилиб, онаси ва опа-сингилларини кулдирарди.

Ўрта мактаб ўқувчиси сифатида у Оҳаё штатининг Синсиннати шаҳридаги франсискан семинариясида ўқишга боради, аммо уни тугатолмайди. 18 ёшида у Нью Йоркда официант бўлиб ишлайди, кечки пайт актёрлик дарсларига қатнайди. Бироз вақт ўтгач, Круз Лос-Анжелесга кўчиб ўтади, шу ерда унинг ажойиб карьераси бошланади. Ёш актёрнинг биринчи муҳим кино лойиҳаси ҳарбий мактаб курсантлари ҳақидаги “Курсантлар” драмаси эди. Кейин режиссёр Френсис Форд Коппола томонидан ўсмирлардан иборат икки тўданинг кураши ҳақидаги “Четлаштирилганлар” фильмида суратга тушади.

“Вампир билан интервю”, “Уддалаб бўлмас топшириқ” ва “Топ Ган” жанговар фильмлари, “Магнолия”, “Ванилранг осмон”, “Сўнгги самурай” драмалари ва бошқа кўплаб филмлар актёр карерасининг чўққиси ҳисобланади.

Крузнинг биринчи хотини актриса Мими Рожерс бўлиб, актёрни айнан у саентология билан таништирган. Мими билан ажрашгач, Круз 1990 йилда 23 ёшли Никол Кидманга уйланади. Эр-хотин Изабелла Жейнни ва Коннор Энтони исмли болаларни асраб олади. 2001 йилда Круз хотинига ажрашмоқчи эканини айтади.

Шундан сўнг у уч йил давомида бошқа актриса Пенелопа Круз билан учрашиб юради. Британия-эронлик навбатдаги актриса Назанин Бониади билан муносабатлари ҳам узоқ давом этмайди.

2005 йилда Том Круз актриса Кети Ҳолмс билан учрашишни бошлайди, 2006 йилда эса эр-хотиннинг Сури исмли қизи туғилади, аммо Ҳолмс 2012-йилда ажрашиш учун ариза беради. 2015 йилда актёр яна уйланмоқчи экани ҳақида хабар тарқалади. Бу сафар шахсий ёрдамчиси Эмили Томасга. Аммо 2017 йилда матбуот Том Круз ва унинг “Уддалаб бўлмас топшириқ 6” фильмидаги ҳамкасби Ванесса Кирби ўртасидаги ишқий муносабатлар ҳақида эълон қилади.

2023 йилда 61 ёшли Том Круз 36 ёшли россиялик аёл “Ягона Россия” партиясининг собиқ депутати Ринат Хайровнинг қизи Элсина билан ишқий муносабатда бўлганликда гумон қилинган. ОАВ хабарларига кўра, жуфтлик Гросвенор хиёбонидаги зиёфатда танишган. 2024 йил февраль ойида Круз Хайрова билан муносабатларини расман эълон қилади.

Шундай қилиб, жуфтлик биргаликда хайрия ташкилотини қўллаб-қувватлаш учун тантанали зиёфатда иштирок этади. Бу беш юлдузли Раффле меҳмонхонасида бўлиб ўтади. Аммо тез орада, Sun газетасига кўра, Голливуд актёри Хайрова билан ажрашади. Нашр суҳбатдошининг таъкидлашича, Том ва Элсина ўртасидаги муносабатлар “шунчаки тугаган”.

• Шоу-бизнес
• голливуд