Норвегия электр автомобиллари сони бензинли автомобиллар сонидан ошиб кетган биринчи мамлакат бўлди. Бу ҳақда “Медуза” хабар берди.

Қайд этилишича, мамлакатда жами 2,8 миллион йўловчи автомобили рўйхатга олинган. Улардан 754 303 таси электр автомобиллари, 753 905 таси бензинли автомобиллар. Гибрид автомобиллар тахминан 366 минг, яна бир миллионга яқин — дизель двигателлари бўлган автомобиллардир. Аммо бундай автомобиллар сони камаймоқда.

“Бу тарихий воқеа. Ўн йил олдин, бу муҳим воқеа бўлишини кам одам кутган эди. Енгил автомобиллар паркини электрлаштириш тез суръатлар билан давом этмоқда ва Норвегия енгил автомобиллар паркида электр автомобиллари устунлик қиладиган дунёдаги биринчи мамлакат бўлиш йўлида тез қадам ташламоқда”, – деди ОФВ директори Ойвинд Солберг Торсен.

Унинг тахминларига кўра, 2026 йилга келиб мамлакатда электр автомобиллари сони ҳам дизель автомобиллари сонидан ошиб кетади.

• Автомобил
• Норвегия