Бош прокуратура ҳузуридаги Департаментнинг ҳудудий бўлинмалари ва ҳуқуқни муҳофаза қилувчи органлар ҳамкорлигида ўтказилган тезкор тадбирлар давомида бир нечта ноқонуний ҳолатлар аниқланди.

Тошкент вилоятида фуқаролар томонидан “Бессопан” саноат майдонидан таркибида олтин бўлган 5 200 кг маъданли тошлар ноқонуний қазиб олинган бўлиб, умумий қиймати 569,8 млн сўмга тенг 315,1 грамм олтин модда аниқланган ҳолда далил сифатида олинди

Шунингдек, Навоий вилоятининг Конимех туманида фуқаролар олтин изловчилар усулида махсус ускуналар ёрдамида олтин аралаш қум ва тошларни қазиб олаётгани аниқланган.

Яна бир ҳолатда Хатирчи туманида ва Зарафобод МФЙ ҳудудида хонадонларда қум ва тошдан олтин ажратиб олиш билан шуғулланган шахслардан умумий 460 кг га яқин олтин заррачалари бўлган материаллар далил сифатида олинган.

Мазкур ҳолатлар бўйича Жиноят кодексининг 196-2-моддаси билан жиноят ишлари қўзғатилиб, тергов ҳаракатлари олиб борилмоқда.