Сирдарёда аёл ва унинг 5 ёшли қизи эрининг иккинчи хотини томонидан пичоқлаб ўлдирилди.

Ҳодиса 29 апрель куни Ширин шаҳарчасида кечга яқин содир бўлган. 1997 йилда туғилган М.С. ўз хонадонида уй юмушлари билан банд бўлган. Турмуш ўртоғининг шаръий никоҳдаги аёли 29 ёшли Н.Х. уйга бостириб келиб, у ва икки қизини пичоқлаган. Сўнгра воқеа жойидан яширинган. Қизалоқларнинг каттаси 5, кичиги 3 ёшда бўлган. Оқибатда аёл ва 5 ёшли қизи Ш.С. воқеа жойида вафот этган. 3 ёшли қизи И.С. эса оғир аҳволда шифохонага ётқизилган. Ҳозирда у жонлантириш бўлимида қолмоқда. “Кун.уз” нинг маълум қилишича, аёл Тошкент вилоятининг Бекобод шаҳридан Сирдарёга келин бўлган.

Марҳума жиянининг айтишича, ўша куни аёл уйида кир ювиб ўтирган. У аёл бориб, пичоқ билан ташланган. Бақир-чақирни эшитиб, уйдан икки қизи югуриб чиққан. Уларга ҳам пичоқ урган. Ҳолат юзасидан Сирдарё вилояти ўта оғир жиноятларни тергов қилиш бўлими томонидан Жиноят кодексининг 97-моддаси (қасддан одам ўлдириш) 2-қисми “а”,“в”,“ж” бандлари билан жиноят иши қўзғатилган. Гумонланувчи Н.Х. процессуал тартибда ушланган. Кодексга кўра, икки ёки ундан ортиқ шахсни, айбдорга аён бўлган ожиз аҳволдаги шахсни, ўта шафқатсизлик билан қасддан ўлдириш 15 йилдан 25 йилгача озодликдан маҳрум қилиш ёки умрбод озодликдан маҳрум қилиш жазоси билан жазоланади.

• Жиноят
• Қотиллик
• Сирдарё