Россиянинг Омск шаҳрида қурилаётган кўп қаватли бинода юз берган ёнғинда Ўзбекистон фуқаролари ҳам жабрланган.

Россия тезкор хизматлари маълумотига кўра, жабрланганлар орасида пудрат шартномаси асосида ишлаган Ўзбекистон фуқаролари бор.

Ёнғин 15 август куни Крупская ва Архитекторлар кўчалари кесишмасида жойлашган қурилиши тугалланмаган кўп қаватли уйнинг биринчи қаватида бошланган. Кейинчалик аланга юқори қаватларга ҳам тарқалган.

Ёнғин 1 минг квадрат метр майдонда содир бўлган. Жабрланганларнинг айримлари танасининг 90 фоизигача қисми куйган. Дастлаб саккиз нафар бемор реанимацияда қолгани, уч нафар жабрланувчи эса тиббий кўрикдан сўнг уйига жавоб берилгани маълум қилинган.

Кейинги маълумотларга кўра, реанимацияда етти киши қолмоқда. Жабрланганларнинг барчаси қурилиш ишчилари бўлиб, уларнинг икки нафари Ўзбекистон фуқаролари.

Ёнғиннинг дастлабки сабаби пайвандлаш ишлари вақтида изоляция материалининг ёниб кетгани бўлиши мумкинлиги айтилмоқда.