Тошкентнинг Яшнобод туманида она 3 ёшли ўғлига мунтазам равишда жисмоний зўравонлик қилгани, шунингдек, уни қаровсиз қолдириш учун ухлатувчи дори воситасини бергани аниқланди. Бу ҳақда Болалар омбудсмани маълум қилди.

Маълум бўлишича, бир гуруҳ қўшнилар Болалар омбудсманига мурожаат қилиб, 1989-йилда туғилган А.Т. вояга етмаган ўғли А.И.га нисбатан мунтазам зўравонлик қилаётгани ҳақида хабар берган. Мурожаатда она болага ухлатувчи дори бериб, уни доимий равишда қаровсиз ва парваришсиз қолдираётгани ҳам қайд этилган.

Ҳолат Болалар омбудсманининг расмий сўрови асосида Ички ишлар бошқармаси ҳамда Ижтимоий ҳимоя миллий агентлиги томонидан ўрганилган.

Текширув натижасида болага нисбатан муттасил тазйиқ ва қийнаш ҳолатлари бўйича Жиноят кодексининг 110-моддаси билан жиноят иши қўзғатилган. Шунингдек, боланинг хавфсизлигини таъминлаш мақсадида унга ҳимоя ордери расмийлаштирилган.

Ҳозирда боланинг соғлиғини тиклаш учун зарур тиббий муолажалар кўрсатилган. Болалар омбудсмани хабарига кўра, унинг саломатлиги ҳозир барқарор ва яхши ҳолатда.

Боланинг қонуний манфаатларини ҳимоя қилиш мақсадида туман васийлик органи томонидан унга вақтинча васийлик таъминланган.

Шунингдек, боланинг онаси ота-оналик мажбуриятларини бажармагани сабабли уни оналик ҳуқуқидан маҳрум қилиш бўйича судга мурожаат этиш учун тегишли ҳужжатлар тайёрланмоқда.

Болалар омбудсмани аввал ҳам болаларга нисбатан зўравонлик ҳолатлари юзасидан ҳуқуқни муҳофаза қилувчи органларга мурожаат қилган. Жумладан, 27-июль куни Сурхондарёнинг Қумқўрғон туманида отанинг 9 ёшли қизига нисбатан шафқатсиз муносабатда бўлгани ҳақидаги ҳолат бўйича ҳам жиноят иши қўзғатилган.