13 августга ўтар кечаси Украина дронлари Россиянинг Бошқирдистон Республикасига ҳужум қилди. Ҳужум оқибатида Салават шаҳридаги “Газпром нефтекҳим Салават” нефтни қайта ишлаш заводи ҳамда Чишми туманидаги Wildberries логистика мажмуаси жойлашган ҳудудда ёнғин юзага келгани хабар қилинди.

Бошқирдистон раҳбари Радий Хабировнинг маълум қилишича, дронлардан бирининг қолдиқлари Салават шаҳридаги саноат зонасига қулаган. Шундан сўнг ҳудудда ёнғин чиққан.

Wildberries компанияси ҳам Бошқирдистондаги объектларидан бири жойлашган саноат ҳудудида ҳаво ҳужуми оқибатида ёнғин юзага келганини тасдиқлади. Компания маълумотига кўра, мазкур объектда товарлар сақланмаган. Хавфсизлик чораларига мувофиқ, ходимлар ҳужумдан аввал эвакуация қилинган.

Ҳозирча ҳужумнинг аниқ кўлами ва объектларга етказилган зарар миқдори ҳақида батафсил маълумот берилмаган. Бошқирдистон расмийларига кўра, ҳужум оқибатида икки киши жароҳатланган.

Россия томони ҳужум ортида Украина турганини билдирган, бироқ Киев расмийлари ҳозирча мазкур воқеа юзасидан расмий муносабат билдиргани йўқ.