Hamkorbank 25 февралдан бошлаб Россиянинг Сбербанкига тегишли мобил илова – "Сбербанк Онлайн" иловаси орқали ўзининг пластик карталарига юборилаётган маблағларни карталарга кирим қилишни вақтинчалик тўхтатди. Бу ҳақда Hamkorbank’нинг расмий сайтида маълум қилинди.

Банк маъмуриятининг билдиришича, банк тизимида олиб борилаётган техник ишлар ҳамда мижозларнинг молиявий йўқотишларига йўл қўймаслик мақсадида шу қарорга келинган.

Айни пайтда юборилаётган маблағларни кирим қилиш қачон тикланиши номаълум.

Маълумот учун, 24 февраль куни АҚШ ҳукумати томонидан эълон қилинган санкцияларнинг навбатдаги пакетида Россиянинг энг йирик банки — Сбербанкка нисбатан ҳам бир қатор санкциялар қўйилган.

Hamkorbank ўзбек банклари ичида Буюк Британия, АҚШ ва Канада томонидан санкциялар қўлланган банк – Сбербанк карталаридан юборилаётган пул маблағларини кирим қилишни тўхтатганини маълум қилган биринчи ўзбек банки бўлди.

Сбербанк билан вакиллик ҳисобварақаларга эга Ўзбекистондаги бошқа банклар – Миллий банк, Агробанк ва Ипак йўли банк ҳали бу борадаги қарорларини маълум қилмаган.

• Ҳамкорбанк
• Россия
• Санкция
• Сбербанк
• Уруш