Ўзбекистонда Маъмурий жавобгарлик тўғрисидаги кодекс янги таҳрирда ишлаб чиқилади. Бу президентнинг 8 май куни кучга кирган фармойишида белгиланди.

Ҳужжатга кўра, маъмурий жавобгарлик тизимини замонавий талаблар асосида қайта кўриб чиқиш, эскирган нормаларни бекор қилиш ва янги ҳуқуқбузарликлар учун жавобгарлик чораларини жорий этиш режалаштирилган.

Шунингдек, маъмурий жазолар тизимини такомиллаштириш, муқобил жазо чораларини кенгайтириш, инсон ҳуқуқлари ва қонуний манфаатларини ҳимоя қилиш механизмларини кучайтириш кўзда тутилган.

Фармойиш билан маъмурий қонунчиликни такомиллаштириш бўйича идоралараро комиссия ташкил этилди. Унинг таркибидан Олий суд, Бош прокуратура, Ички ишлар вазирлиги ва бошқа мутасадди идоралар вакиллари ўрин олган.

Адлия вазирлиги 2027 йил 1 апрелга қадар янги таҳрирдаги кодекс лойиҳасини ишлаб чиқиб, жамоатчилик муҳокамасидан ўтказиши керак бўлади.

Маълумот учун, амалдаги Маъмурий жавобгарлик тўғрисидаги кодекс 1994 йилда қабул қилинган бўлиб, 1995 йилдан буён амал қилиб келмоқда.