“Адолат” СДП Ўзбекистонда TikTok’ни бутунлай тақиқлаш ташаббуси билан чиқди. Бунга мазкур платформанинг ўзбекистонлик ёшлар орасида маънавий бузуқ хатти-ҳаракатларга ундаётгани сабаб бўлган.

“Бугунги ёш авлоднинг “Тик-токер” лик васвасасида олаётган турли-туман видеолари орасида ўзгалар ҳаётига дахл қилувчи номақбул кадрларнинг кўпаяётганлиги мазкур масалага жиддийроқ ёндашишимиз лозимлигидан далолат беради”, – деб ёзади партия Матбуот хизмати.

“Адолат” партияси муносабатида, шунингдек, яқин кунларда Самарқанд вилоятида ёш ўспириннинг кекса ёшли кишининг юзига тепгани акс этган видео TikTok’га жойлангани эслаб, қораланади.

“Ён-атрофимизда содир бўлаётган бундай аянчли воқеалар кўпайиб бораётганига  қайсидир маънода бебош ёшларнинг ота-оналари баробарида  биз ҳам бирдек жавобгар эмасмизми? Бундай иллатларга биргаликда курашмас эканмиз, пана-паналарда майда безориликлар авж олиб бораверади. Умуман олганда бундай ҳолатларни майда безорилик деб ҳам атаб бўлмайди. Қадриятларимизга зид қарашлар ортидан эргашаётган фарзандларимизнинг  бундай хунук хатти-ҳаракатларини шунчаки ёшлик бебошликларига ёйиб юраверар эканмиз, юртимиз ва давлатимиз ёрқин келажагини жиддий хавф остига қўйган бўламиз”, – дейилади партия муносабатида.

“Адолат” cоциал-демократик партияси фаоллари “зўравонликка тамомила қарши инсонлар сафида” ҳамда “ёшларни  миллатга ёт бўлган ҳар қандай ғоя ва қарашлардан ҳимоялаш тарафдори” эканлигини таъкидлаб, бу йўлда керак бўлса жиноий жавобгарлик чораларини кучайтириш, TikTok’ни сингари мобил иловаларни бутунлай блоклаш лозимлигини айтади.

“Шусиз ҳам таъқиқлар мавжуд-ку” дейишимиз мумкин. Бироқ кўр-кўрона  машҳурликга ўч ёшлар онгини заҳарлаб, ижтимоий тармоқда  шухрат қозонишга “олтин кўприк” вазифасини ўтаётган тик-ток билан “тик-токерлар”имиз  VPN иловаси орқали уланиш имконияти борлиги бу масалани ҳам ўрганиб чиқиш  зарурлигини кўрсатади”, – дейилади муносабатда.

Эслатиб ўтамиз, ўтган йилнинг сентябр ойида мазкур масалага “Миллий тикланиш” партияси ҳам эътибор қаратган ва навоийлик қизларнинг ахлоқсиз суҳбатлари акс этган видеога ўз муносабатини билдирган эди.

• "Адолат" партияси
• TikTok