Москвада Тожикистон ва Ўзбекистон фуқароларига сохта ҳужжатлар асосида Россия фуқаролигини олишга ёрдам берган жиноий гуруҳ қўлга олинди. Бу ҳақда Россия Тергов қўмитаси хабар берди.

Қайд этилишича, гумонланувчилар 2023 йилда давлат органлари фаолиятини тушунадиган ва Россия Федерацияси фуқаролигини бериш бўйича қарор қабул қилиш ваколатига эга бўлган мансабдор шахслар билан алоқаларга эга бўлиб, кўплаб жиноятлар содир этиш ва шахсий бойлик орттириш мақсадида жиноий гуруҳ тузган.

“Ҳамкорлар” Тожикистон ва Ўзбекистон фуқаролари орасидан Россия фуқаролигини қонуний асослар бўлмасдан олишни истаган шахсларни топган. Кейин, улар 150-350 минг рубль эвазига Украина фуқаролигини тасдиқловчи сохта пластик паспортлар ва Донетск ҳудудида рўйхатдан ўтганлик тўғрисидаги сохта маълумотномаларни тайёрлаб берган. Бу хорижий фуқароларга соддалаштирилган тартибда Россия фуқаролигини олиш имконини берган.

Келтирилишича, жиноят иши доирасида Москва, Донетск, Ростов-Дон ва Тулада 30 та тинтув ўтказилиб, давлат органлари ва муассасаларига тегишли бўлган кўплаб штамплар, муҳрлар ва бланкалар, шу жумладан, чет давлатнинг бланкалари мусодара қилинган.

Шунингдек, жиноий гуруҳнинг 9 нафар ташкилотчиси қўлга олинган. Улар билан зарур тергов ҳаракатлари олиб борилиб, уларга айблов эълон қилинган.

• Fuqarolik
• Россия
• Украина