“Ўзбекистоннинг янги элчиси Фаррух Турсунов Ватиканнинг Ҳаворийлар саройида Рим папаси Лев XIV га ишонч ёрлиқларини топширди”, – деб хабар қилмоқда “Дунё” агентлиги.

Суҳбат чоғида элчи Ўзбекистон президенти номидан Рим папасига самимий салом ва энг эзгу тилакларини етказди. Рим папаси Лев XIV эса Ўзбекистон президенти ва халқига чуқур ҳурмат-эҳтиромини изҳор этди. У Ўзбекистон ва Ватикан ўртасида дипломатик муносабатлар ўрнатилганидан буён ўтган 33 йил давомида турли миллат ва дин вакиллари ўртасида дўстлик ва ўзаро англашувни мустаҳкамлашга қаратилган мустаҳкам ҳамкорлик салоҳияти шаклланганини таъкидлади.

Шунингдек, у Самарқанднинг Шарқ ва Ғарб дунёсига таъсир кўрсатадиган фалсафий ва диний тафаккурнинг йирик маркази сифатидаги аҳамиятига алоҳида эътибор берди. Ўзбекистон анъанавий равишда динлараро тотувлик ва бағрикенглик тамойилларини илгари суриш тарафдори экани, бу борадаги халқаро ташаббусларни фаол қўллаб-қувватлаётгани таъкидланди.

Учрашув якунида Рим папаси Лев XIV ўзбек халқининг гуллаб-яшнаши учун ибодат қилишини таъкидлаб, Ўзбекистон ва Ватикан ўртасидаги дўстлик ва конструктив ҳамкорлик янада мустаҳкамланишини тилаган.

Маълумот учун, Ўзбекистон ва Ватикан ўртасида дипломатик муносабатлар 1992 йил 12 октябрда ўрнатилган.

• Элчи
• Ўзбекистон
• Rim papasi