Ўзбекистон президенти матбуот котиби Шерзод Асадов давлат раҳбарининг ҳафталик иш режасидан ўрин олган тадбирлар ҳақида маълумот берди. Унинг қайд этишича, бошланган иш ҳафтаси ҳар доимгидек муҳим воқеаларга бой бўлиши кутилмоқда.

27 октябрда давлат раҳбари жорий йилда иқтисодиётда кутилаётган натижалар ва 2026 йилга мўлжалланган асосий макроиқтисодий кўрсаткичлар юзасидан кенгайтирилган йиғилиш ўтказади. Куннинг иккинчи ярмида президент АҚШ президентининг Жанубий ва Марказий Осиё бўйича махсус вакили Сержио Гор ва АҚШ давлат котибининг ўринбосари Кристофер Ландауни қабул қилади.

Ўзбекистон тарихий тадбир – ЮНЕСКО Бош конференциясининг 43-сессиясини қабул қилмоқда. Президент Самарқандга ташриф буюриб, илк бор Париж шаҳридан ташқарида ўтказилаётган анжуманнинг очилишида иштирок этади, маданият, илм-фан ва таълим соҳаларидаги халқаро ҳамкорликни мустаҳкамлаш бўйича ташаббусларни илгари суради ҳамда қатор икки томонлама учрашувлар ўтказади.

Бундан ташқари, жорий ҳафтада Ўзбекистонга Сербия президенти Александр Вучич ва Финляндия президенти Александр Стубб ташриф билан келади. Саммитлар доирасида олий даражадаги музокаралар ўтказилиб, икки томонлама ҳамкорликни янада кенгайтиришнинг долзарб масалалари муҳокама қилинади.

• Президент
• Шавкат Мирзиёев