Ҳайдарободда одам савдоси билан шуғулланган гуруҳ фош қилинди. Ҳиндистоннинг Ҳайдаробод шаҳрида ҳуқуқни муҳофаза қилувчи органлар томонидан ўтказилган тезкор рейд давомида одам савдоси билан шуғулланган жиноий гуруҳ фаолиятига барҳам берилди. Операция чоғида уч нафар аёл, жумладан бир нафар Ўзбекистон фуқароси ҳам озод этилган. ​

Тергов маълумотларига кўра, жиноят схемасини “Style Maker” гўзаллик салони собиқ эгаси — 36 ёшли Шариф исмли шахс ташкил этган. У ишсиз аёлларни юқори даромадли иш ваъдаси билан жалб қилиб, сўнг уларни жинсий эксплуатацияга мажбурлаган.

​Банжара Ҳиллс туманидаги меҳмонхонага уюштирилган рейдда 5950 рупий нақд пул, 13 дона мобил телефон ва турли воситалар ашёвий далил сифатида мусодара қилиниб, ташкилотчи, меҳмонхона маъмурияти ҳамда етти нафар мижоз қўлга олинган. Полиция вакилларининг маълум қилишича, рейд ўз вақтида ўтказилгани сабабли аёлларнинг кейинги зўравонлик ва эксплуатациядан ҳимоя қилиниши таъминланган.

Ҳозирда барча аёллар тиббий кузатув остига олинган, жиноят тафсилотлари юзасидан тергов ишлари давом этмоқда.

• Фоҳишабозлик
• Ҳиндистон
• Одам савдоси