Президент матбуот хизматининг хабар беришича, Шавкат Мирзиёев Янги Ўзбекистон кўчасида қурилаётган ерости автомобиль йўлини кўздан кечирган.

Сўнгги йилларда Янги Ўзбекистон кўчасида истироҳат боғи, уй-жойлар, университет ва Олимпия шаҳарчаси қурилди. Бу кўча келгусида Янги Тошкент шаҳрига олиб борувчи асосий йўллардан бири бўлади.

Шу боис, Янги Ўзбекистон кўчаси бўйлаб узунлиги 468, кенглиги 25 метр бўлган ерости автомобиль йўли қурилди. У соатига 10 мингдан зиёд автомобилни ўтказиш имкониятига эга.

Туннелнинг усти яшил ҳудудга айлантирилиб, “Янги Ўзбекистон” боғи билан Олимпия шаҳарчаси ўртасида пиёдаларнинг хавфсиз ҳаракатланиши таъминланди. Шунингдек, мазкур йўналишда лойиҳалаштирилган метро йўли учун туннель ва бекат ҳам қурилди.

Қайд этилишича, амалга оширилаётган ҳар бир лойиҳада экологик жиҳатлар алоҳида инобатга олинади.

“Янги Ўзбекистон кўчасида барпо этилган ерости автомобиль йўли машиналарнинг вақт сарфини 2 баробарга қисқартириб, кунига 1 тонна ёнилғи иқтисод қилинишига ва атмосферага чиқариладиган зарарли газлар миқдори 2 тоннага камайишига сабаб бўлади”, – дейилади хабарда.

Давлат раҳбари ерости автомобиль йўлининг замонавий стандартлар асосида ташкил этилганига эътибор қаратди.

• Шавкат Мирзиёев
• Тошкент