Бугун пойтахтимиздаги “Ҳилтон” меҳмонхонасида Жаҳон футболи афсоналари билан учрашув ташкил этилди. Тадбирда журналистлар ўзларини қизиқтирган бир қатор саволларга жавоб олишди.

Савол: Замонавий футболда ҳимоя чизиғи қанчалик кучайган. Сиз ўйнаган ва жаҳон чемпиони бўлган даврдаги Италия терма жамоаси кучлими ёки айни пайтда фаолият юритаётганими?

Фабио Каннаваро: “Менинг фикримча 2006 йилда жаҳон чемпиони бўлган терма жамоамиз кучлироқ эди. Боиси ҳамма чизиқда энг маҳоратли, бетакрор ўйинчилар жамланишганди. Бежизга чемпион бўлмаганмиз.

Замонавий футболда ҳимоя қанчалик кучайган деган савол анча кенг қамровли. Ҳозирги футболда ҳимоячи фақат тўпни олиб юрган рақибга қарши ўйнамасдан, бутун майдонни ва унда бўладиган воқеалар ривожини олдинда кўра билиши керак. Бошқача айтганда бутун майдонни назорат этиб туриши лозим. Айни пайтда ҳимоячининг ваколат доираси кенгайган”

Савол: Ўзбекистон терма жамоасининг собиқ сардори Одил Аҳмедов билан “Анжи”да бирга ўйнагансиз. Ўша даврлардан қандай умумий хотиралар қолган?

Роберто Карлос: “Илиқ хотираларни йодга туширган саволингиз учун катта раҳмат. Одил Аҳмедов жамоамизга келган пайтдаёқ унинг салоҳиятига амин бўлганман. Майдонни кўра билиши, ўйинни ўқиши, ташкил этиш қобилияти ва аниқ тўп узатишлари билан юқори даражадаги футболчи эканлигини исботлаган. Одил билан бирга тўп тепиш мен учун шараф бўлган. Одил билан яхши дўст, ўртоқ бўлиб қолганмиз. Кеча футзал учрашувини биргаликда ўтириб, томоша қилдик. У билан яна дийдорлашганимдан хурсандман.

Суперкубокка таклиф боис Ўзбекистонга келдим. Мамлакатингиз футболининг жуда тез, жадал ўсаётганини ўз кўзим билан кўрдим. Барчангизни Жаҳон чемпионати йўлланмаси билан табриклайман. Бизни Тошкентга, ажойиб тадбирга таклиф этганликлари учун ЎФФ раҳбариятига миннатдорлигимни билдираман.

Савол: “Хаби Алонсо бошчилигида “Реал” қанчалик юксак натижаларни қайд эта олади?

Роберто Карлос: - Мен “Реал”нинг фахрий элчисиман. Кўп маълумот бера олмайман. “Реал” катта клуб. Ҳамиша юксак марраларни кўзлаб, улкан мақсад сари ҳаракат қилади. Бу жамоага ҳар бир мутахассис ҳар томонлама тайёр бўлиб келади. Хаби Алонсода ҳам катта иштиёқ бор. Биз уни қўллаб қувватлаймиз. Унга ишонамиз.

Савол: “Ўзбекистонга ташрифингиздан мамнунмисиз? Бизнинг мамлакат ҳақидаги таассуротларингиз? Ўзбекистондан кейин яна қайси мамлакатларга бормоқчисиз?”

Клод Макелеле: “УЭФА таркибида 10 йилдан зиёд фаолият юритиб келяпман. Ўзбекистонга мени таклиф этишгани учун ташкилотчиларга катта раҳмат. Бундай тадбирлар ёш авлоднинг баркамол вояга етиши, соғлом авлод тарбияси учун жуда муҳим. Бизни жуда илиқ кутиб олишгани учун миннатдорман. Футбол тарғиботига қўшаётганларга ҳиссаси учун катта раҳмат”

• Футбол
• Интервю
• Спорт
• Yulduz