Россия қўшинлари учун бугун, 6 январь куни соат 12:00 дан бошлаб Украинадаги барча ҳаракат чизиқлари бўйлаб 36 соат давомида ўт очишни тўхтатиш режими жорий қилинади.

Россия мудофаа вазирлиги қўшинларга бу кўрсатмани мамлакат президенти Владимир Путин топшириғига биноан Мудофаа вазири Сергей Шойгу берган.

“Президент топшириғига мувофиқ, Россия Федерацияси Мудофаа вазири қўшинларга 6-январь соат 12:00 дан 7 январь соат 24:00 гача Украинадаги томонлар ўртасидаги алоқа чизиғи бўйлаб 36 соатлик ўт очишни тўхтатиш режимини жорий этиш бўйича топшириқ берди”, – дейилади Россия Мудофаа вазирлиги баёнотида.

Қайд этилишича, кеча 5 январь куни Путин Шойгуга вақтинчалик ўт очишни тўхтатиш ҳақида кўрсатма берган.

“Православ динига эътиқод қилувчи кўп сонли фуқаролар жанговар ҳудудларда истиқомат қилаётганидан келиб чиқиб, биз Украина томонини ўт очишни тўхтатишни эълон қилишга ва уларга Рождество арафасида, шунингдек, Рождество кунида маросимларда қатнашишларига рухсат беришга чақирамиз”, – дейилади Путиннинг кўрсатмасида.

Шунингдек, Бирлашган Миллатлар Ташкилоти Бош котиби Антониу Гутерришнинг матбуот котиби Россиянинг православ Рождество байрамларида Украинадаги барча ҳарбий алоқа чизиғи бўйлаб ўт очишни тўхтатиш режимини жорий қилгани ташкилот томонидан олқишланганини маълум қилди.

• Россия
• Украина
• Уруш