Аввалроқ, Наманганда 152 та қоидабузарлик оқибатида 410 млн сўм жарима қайд этган автомобил аниқлангани ҳақида хабар берилганди.

Таниқли ҳуқуқшунос Хушнудбек Худойбердиев ушбу ҳолатга ўз муносабатини билдириб, тизим яхши йўлга қўйилмаганини танқид қилди.

“Бунақалар “йўл террористлари” дейилади, шунақа калтафаҳмларнинг дастидан ҳар йили минглаб инсонлар ҳалок бўлмоқда, қанча оила ота-она ёки фарзанд доғида куймоқда. Лекин бунақалар барибир йўқолиб кетмайди. Яна янгилари чиқаверади. Чунки тизим шунга йўл қўйиб беради”,– деб ёзади у.

Шунингдек, ҳуқуқшунос юздан ошиқ ҳуқуқбузарликлар содир қилган автомобил эгаси шу пайтгача қидирувга берилмаганини катта хатолигини таъкидлаган.

“Мана, масалан, шу видеода айтилишича, 01 Т 234 ЗА сохта рақамига 152 та қоидабузарлик қайд этилган бўлса-да, лекин бу рақам базада бўлмагани учун жарима қўллаш ҳақида қарор чиқаришнинг имконияти бўлмабди эмиш. Нима??? Тушунмадим, шу пайтгача 152 марта сохта рақам радарларга тушган бўлса, лекин у базада бўлмаса, нега уни тезда текширмадинглар? Нега кўчаларда сохта рақамли битта машина тезликни 152 марта оширгани қайд этилган бўлса-да, уни бартараф этиш чорасини кўрмадинглар. Нега қидирувга берилмади? Нега йўллар тўсилмади? Бу нима аҳмоқгарчилик? Бу қанақа хавфсизлик? Шуми сизларнинг ақлли ва замонавий тизиминглар? Шуми сизларнинг “хавфсиз шаҳар” консепсиянглар?”,– деб ёзади Худойбердиев.

Хушнудбекнинг ёзишича, тизим яхши йўлга қўйилмас экан, эртага ҳақиқий террорист ҳам бундай ишларни қилишдан тап тортмаслиги мумкин.

“Рақам базада йўқлиги учун жарима ёзолмаяпмиз, деб икки қўлингларни бурнингларга тиқиб юраверасизларми шунақа? Эртага бирорта ҳақиқий террорист машинасига сохта рақам тақиб, аҳоли учун шунча катта реал хавф туғдириб юрса ҳам бирорта орган буни аниқлолмасдан юраверасизларми шунақа? Билмадим, нима дейишга ҳам ҳайронман. Бунақа бузуқ тизим мавжуд экан, йўлларимиз тартибга келишини кутиш нотўғри”,– деб хулоса қилган ҳуқуқшунос Хушнудбек Худойбердиев.

• Наманган
• Qoidabuzarlik