Ўзбекистон инсон ҳуқуқлари “Эзгулик” жамияти раиси Абдураҳмон Ташанов ўзининг Facebook саҳифасида жойлаштирган постида Тошкент вилоятида жойлашган “Товоқсой” қамоқхонасида сақланаётган 20-ёшли махбус Алишер Якубов ўзини юқори қаватдан ташлаб ўз жонига қасд қилгани ҳақида ёзган ва буни қамоқхона ходимларининг мунтазам қийноқлари натижасида юзага келган деб ўйлашини таъкидлаган. Унинг фикрича, қамоқхона расмийлари ушбу ходиса ҳақида бор ҳақиқатни очиқламай яширишади.

“20 яшар Алишер Якубов 2020 йилнинг февралида 10 йилга қамалган. У шу йилнинг  25 июньида ўз жонига қасд қилган, ўзини юқори қаватдан ташлаган.

Ҳозир бир аҳволда “Сангород”да ётибди. Шу йилнинг январида отаси Элмурод акага ўзининг мунтазам қийноқларга тутилаётгани ҳақида хат ёзган.

“Сўнгги марта ўғлим 20 ёшга тўлган 10 апрель куни онаси билан биргаликда кўриб келгандик. Эртасигаёқ боламни карсерга ёпишибди”, – дейди Элмурод Якубов.

Унинг айтишича, Алишер жонига қасд қилгани ҳақида орадан 4 кун ўтиб, яқинларига хабар беришибди. Орада мазкур ҳодиса бўйича бир одамни ишдан бўшатишибди. Суриштирув хулосалари борасида эса ҳеч нима дейишмаётган экан.

Суд ҳукми билан қамалган бу йигитча панжара ортига кирганида 18 ёшда эди. Бош миясида болаликдан жароҳати бор экан, “Эзгулик”ка қилган мурожаатига қўшиб бир дунё тиббий хулосаларни ҳам тақдим қилишган бояқишлар.
Талаби – қийноққа солган ўша зўровонларга нисбатан чора кўрдириш экан, адвокатга қўли калта ота-онанинг. Колония маъмурияти эса боланинг ўзини иродасизликда айбламоқда.

Кўринадики, иродасиз бўлсангиз, қамоққа тушманг. Акс ҳолда, сиз учун ҳеч ким жавоб бермайди. Расмийлар бундай нохуш ҳодисани яширишади, гўё ҳамма ёқ чаман, гуллаб кетган, яшнаб кетган.

Биламизки, инсон ҳуқуқлари бўйича Миллий марказ конститусиявий ислоҳотлар билан банд. Унда қийноққа қарши миллий превентив механизмлар гуруҳи қани? Омбудсман қаерда?

Биз янги қомусимиз лойиҳасини инсон ҳуқуқларига оид гўзал нормалар билан тўлдираётган паллада иродасизлар жонига қасд қилиб ўтирибди. Эртага соҳа мулозимлари бу масала бўйича жимжимадор баёнот қилишса керак. Ҳартугул, бунга кўникиб қолдик.

Иродангизни мустаҳкамланг! Зўровонлик қаршисида довдираб қолманг, аксинча биз ҳам бу негатив ҳолатларни ёзаверишдан зерикиб қоламиз.

Дарвоқе, ўғлимга зулм қилаётганларнинг буюртмачилари ташқарида", дейди аламзада ота.

“Бунақа деманг-ей, ишлам калламай қолади, бизнинг қамоқларимиз энг мустаҳкам қўрғон” дедим фахрланиб”, – деб ёзади Ўзбекистон инсон ҳуқуқлари фаоли “Эзгулик” жамияти раиси Абдураҳмон Ташанов ўзининг Facebook саҳифасида.

• Abdurahmon Tashanov
• Қамоқхона