Туркия Суперлигаси 11-туридан ўрин олган “Башакшеҳир” ҳамда “Кожаэлиспор” жамоалари ўртасидаги баҳс якунига етди. Истанбулдаги “Фотиҳ Терим” стадионида кечган беллашувда мезбонлар кичик 1:0 ҳисобида ғалаба қўлга киритишди.

Учрашувдаги ягона гол 90+1-дақиқада “Башакшеҳир”нинг ўзбекистонлик ҳужумчиси Элдор Шомуродов томонидан киритилди. Шомуродов ҳакам томонидан белгиланган 11 метрлик жарима зарбасини аниқ амалга ошириб, жамоасига муҳим 3 очко тақдим этди.

Мазкур натижадан сўнг Нури Шаҳин бошчилигидаги “Башакшеҳир” ҳисобидаги очколар сони 13 тага етиб, жамоа Туркия Суперлигаси турнир жадвалида 9-поғонага кўтарилиб олди. Мағлубиятга учраган “Кожаэлиспор” клуби эса 11 очко билан 11-поғонада қоладиган бўлди.

Шунингдек, Элдор Шомуродов ушбу беллашувда амалга оширилган муваффақиятли пенальти орқали чемпионатдаги голлари сонини 7 тага еткизиб олди. Элдор ҳозирда Туркия Суперлигаси тўпурари бўлиб турибди.

• Елдор Шомуродов
• Футбол
• Туркия