АҚШ 28 ноябрь куни Афғонистон фуқароларига виза беришни тўхтатди. Бу ҳақда Kabul Now нашри хабар берди.

Маълум қилинишича, чекланишга Вашингтонда Оқ уй яқинида афғонистонлик шахс содир этган отишма сабаб бўлган.

“Афғонистон паспорти эгаларига виза бериш зудлик билан тўхтатилди. Қўшма Штатлар миллий ҳамда жамоат хавфсизлигини ҳимоя қилиш учун барча зарур чоралар кўрилмоқда”, – дейилади АҚШ Давлат департаменти баёнотида.

Давлат котиби Марко Рубио ҳам ушбу тақиқни тасдиқлаган ва Х ижтимоий тармоғида қуйидагича пост қолдирган:

“АҚШнинг халқи ва миллатини ҳимоя қилишдан кўра устувор вазифаси йўқ”.

Сиёсатдаги бу ўзгариш 26 ноябрь куни Вашингтонда содир бўлган отишма ортидан юзага келган. Унда 29 ёшли афғонистонлик Раҳматулло Лаканвал Оқ уй яқинида Ғарбий Виржиния Миллий гвардиясининг икки аъзосига қарата ўқ узганликда гумон қилинмоқда. Воқеадан сўнг, ҳарбий Сара Бекстром олган жароҳатлари туфайли вафот этган, 24 ёшли Ҳаво кучлари штаб сержанти Эндрю Вулф эса оғир аҳволда қолмоқда.

Лаканвал Қўшма Штатларга 2021 йилда борган. У илгари Афғонистон армиясида ўн йил хизмат қилган, шу жумладан Қандаҳорда АҚШ махсус кучлари билан биргаликда бир неча марта сафарбарликда қатнашган. АҚШ расмийларига кўра, у Афғонистонда Марказий разведка бошқармаси томонидан текширувдан ўтказилган ва 2025 йил бошида сиёсий бошпана олиш учун якуний рухсатни олган.

Отишмадан сўнг, Трамп собиқ президент Байден маъмурияти даврида АҚШга киритилган Афғонистон фуқароларини тўлиқ текширувдан ўтказишни буюрган. Кейинчалик, АҚШ Фуқаролик ва иммиграция хизмати Афғонистон иммиграция ва бошпана аризаларини кўриб чиқишни қачон давом эттириши маълум қилинмаган ҳолда тўхтатганини тасдиқлаган.

 в

• АҚШ
• Афғонистон
• Виза