АҚШнинг амалдаги президенти Truth Social ижтимоий тармоғидаги саҳифасида автоперо (автоматик имзо қўювчи қурилма) ёрдамида имзоланган барча фармонлар ва бошқа ҳужжатларни бекор қилишга қарор қилганини билдирди.

“Уйқучи Жо Байден автоперо ёрдамида имзолаган ҳар қандай ҳужжат бекор қилинади ва ўз кучини йўқотади, бу барча ҳужжатларнинг тахминан 92 фоизи дегани. Автоперо АҚШ президентининг махсус рухсатисиз ишлатилиши мумкин эмас”, — деб ёзди Трамп.

Автоперо Жо Байденнинг президентлик муддати охирида афв этиш ва жазони енгиллаштириш ҳужжатларини имзолаш жараёнида қўлланган эди. Афв этилганлар орасида собиқ президентнинг ўғли Ҳантер Байден ҳам бўлган.

Жо Байденнинг айтишича, у барча қарорларни шахсан ўзи оғзаки тарзда тасдиқлаган, ёрдамчилари эса автоперодан фойдаланган, чунки гап “жуда кўп одамларнинг тақдири” ҳақида кетган.

Доналд Трамп аввал ҳам Байденнинг афв этиш тўғрисидаги қарорлари ҳақиқий эмаслигини, чунки улар собиқ президентнинг хабарисиз автоперо билан имзоланганини даъво қилган эди. Байден эса буни рад этган.

• АҚШ
• Байден
• Трамп