Озарбайжон ва Россия ташқи ишлар вазирликлари қўшма баёнот билан чиқиб, 2024-йил декабр ойида юз берган Озарбайжон ҳаво йўллари (АЗАЛ) йўловчи самолёти ҳалокати бўйича барча асосий масалалар юзасидан келишувга эришилганини маълум қилди.

Баёнотда қайд этилишича, фожиа оқибатлари билан боғлиқ масалалар, жумладан товон тўловлари ҳам тартибга солинган. Бироқ келишув тафсилотлари очиқланмаган.

Томонлар бу қадамни ўзаро ҳамкорлик ва иттифоқчилик муносабатларини янада мустаҳкамлашга қаратилган ҳаракат сифатида баҳолаган.

2024-йил 25-декабрь куни Боку–Грозний йўналишида парвоз қилаётган АЗАЛ авиакомпаниясининг Embraer E190 самолёти Қозоғистоннинг Оқтов шаҳри яқинида ҳалокатга учраган. Ҳодиса оқибатида 38 киши ҳалок бўлган, 29 киши омон қолган.

Кейинчалик Россия президенти Владимир Путин самолёт Россия ҳаво мудофаа тизими томонидан тасодифан уриб туширилганини тан олган эди. Авиаҳалокатдан сўнг Москва ва Боку ўртасидаги муносабатларда совуқлик кузатилган.