Россия ва Украина ўртасида асир ҳарбий хизматчилар алмашинуви бўлиб ўтди. Бу ҳақда Россия Мудофаа вазирлиги хабар берди.

Унга кўра, томонлар 100 нафар россиялик ҳарбийни 100 нафар украинларга алмашишган.

Хабар берилишича, Россия ҳарбийлари музокаралар жараёни натижасида 8-феврал куни Киев назорати остидаги ҳудуддан қайтган. Россия ҳаво-космик кучларининг самолётлари озод қилинган жангчиларни Москвага олиб борган, у ерда улар даволанади ва реабилитация қилинади. Ҳарбий хизматчиларга зарур психологик ёрдам ҳам кўрсатилаётгани айтилмоқда.

Мудофаа вазирлиги, шунингдек, Бирлашган Араб Амирликлари алмашинув жараёнида воситачилик қилганини таъкидлаган.

Москва ва Киев ўртасида ҳарбий асирларнинг олдинги алмашинуви 31-январ куни бўлиб ўтган эди. Унда 195 киши Россияга қайтиб келган. Худди шу миқдордаги маҳбуслар Украинага топширилган эди.

• Россия
• Украина