Қирғизистон республикасидаги халқ депутати Тазабек Икромов овоз беришга бормаган сайловчиларни қирғиз пулида 5 минг сомдан (690 минг сўм) жаримага тортишни таклиф қилмоқда. Халқ депутатининг ғояси Марказий сайлов комиссияси томонидан қўллаб-қувватланган, бироқ Вазирлар Маҳкамаси бунга қарши чиқди ва бу Конституцияга зид эканлиги таъкидланган.

Лойиҳа ташаббускори Тазабек Икромовнинг айтишича, қонун лойиҳасининг мақсад ва вазифалари фуқароларнинг сайлов ҳамда референдумларда ўз ваколатларини бевосита амалга оширишни тўлиқ таъминлашдан иборат. Конституциявий қонун лойиҳасида Қирғизистонда истиқомат қилувчи барча фуқаролар президент ва Жогорку Кенеш депутатлари сайловида узрли сабабларга кўра иштирок этувчи шахслар бундан мустасно, иштирок этиши шарт деган норма киритиш таклиф қилинмоқда.

Муҳокама чоғида яна бир депутат Жамила Исаева узрли сабабларни аниқлаш масаласини кўтариб, уларни қонун лойиҳасида тўғридан-тўғри кўрсатиш зарурлигини таъкидлади. Шунингдек, у жарима солиш ва ундириш тартиби, механизмларига эътибор қаратди.

Ҳукуматнинг кўпгина аъзолари ва халқаро ташкилот вакиллари бу қонун лойиҳаси Қирғизистон Конституцияси ва халқаро шартномалар меъёрларига зид, сайловда иштирок этиш ҳар бир фуқаронинг ҳуқуқи бўлиб, уни сайловда қатнашмагани учун жаримага тортиш қонунга мувофиқ келмайди деган хулосани беришган.

Бу фикрни илгари сурган депутатнинг сўзларига кўра, хорижий давлатлар тажрибасига назар ташлаш керак. Европа, Австралия, Бразилия , Туркияда эса узрсиз сабабларсиз сайловларга келмаган фуқароларни жавобгарликка тортиш амалиёти мавжуд ва бу сайловчиларнинг иштирокини таъминлайди.
Депутат овоз беришни эътиборсиз қолдирганлик учун маъмурий жавобгарлик тўғрисидаги норма киритишни таклиф қилмоқда. Агар фуқаро узрли сабабсиз сайловга келмаса, ундан 5 минг сом жарима тўлаш талаб этилади. Бироқ қонун лойиҳаси муаллифи у ёки бу сайловчи нега ўз фуқаролик бурчини бажармаганини қандай, ким текширишига аниқлик киритмаган.

• Жарима
• Президент
• Қирғизистон
• saylov