Профессионал бокснинг ярим ўрта вазн тоифаси вакили, ўзбекистонлик Шаҳрам Ғиёсовнинг навбатдаги рақиби ва жанг санаси маълум бўлди. Бу ҳақда боксчининг ўзи Instagram саҳифаси орқали маълум қилди.
Қайд этилишича, 30 ёшли чарм қўлқоп устаси жорий йил 17 июнь куни АҚШда америкалик Хэрольд Кальдеронга қарши WBA Элиминатор жангида рингга кўтарилади.
“Ассалому алайкум, юртдошлар. Худо хоҳласа, жангим 17 июнь куни АҚШда бўлиб ўтади. Рақибим америкалик енгилмас спортчи – 27-0. Насиб қилса, уни мағлуб этганимдан кейин чемпионлик жангига бир қадам қолади”, – дея ёзиб қолдирган Ғиёсов.
Маълумот учун, Ғиёсовнинг рақиби америкалик Харольд Кальдерон фаолияти давомида 27 та жанг ўтказган ва уларнинг барчасида ғалаба қозонган. 18 та жангда рақибларини муддатидан аввал мағлубиятга учратган. Ушбу жанг ғолиби WBA чемпионлик камари учун расмий ва мажбурий даъвогарга айланади.
Эслатиб ўтиш мумкин, Ғиёсов сўнгги жангини ўтган йилнинг 8 май куни Лас-Вегас шаҳрида мексикалик Кристиан Гомесга қарши ўтказиб, очколар ҳисобига кўра ғалаба қозониб проф боксдаги 13-ғалабасини қўлга киритган эди. Шу тариқа у IBF North American минтақавий чемпионлик камарини қўлга киритган.
Жорий йил 29 июль куни айнан ушбу вазн тоифасида америкалик икки енгилмас жангчилар – афсонавий чемпион Теренс Кроуфорд (39-0-0) ва Эррол Спенс (28-0-0) мутлақ жаҳон чемпионлиги учун рингга кўтарилади. Агар Ғиёсов Кальдеронни мағлуб этса, бир йўла тўртта чемпионлик камари учун (WBO, WBC, IBF, WBA) даъвогарлик қилиши мумкин.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!