7 май куни Ўзбекистон Президенти Шавкат Мирзиёев Австрия Республикасининг Европа ва ташқи ишлар федерал вазири Беате Майнл-Райзингер ҳамда ички ишлар федерал вазири Герхард Карнер бошчилигидаги делегацияни қабул қилди.

Президент матбуот хизматига кўра, учрашув аввалида меҳмонлар давлат раҳбарига Австрия Федерал Президенти Александр Ван дер Белленнинг самимий саломи ва эзгу тилакларини етказган.

Мулоқот давомида икки давлат ўртасидаги амалий ҳамкорликни янада ривожлантириш масалалари муҳокама қилинди. Қайд этилишича, сўнгги йилларда Ўзбекистон ва Австрия ўртасидаги товар айирбошлаш ҳажми уч баробар ошган.

Бугунги кунда қурилиш материаллари, тоғ туризми, соғлиқни сақлаш, кимё саноати, қишлоқ хўжалиги ҳамда банк-молия соҳаларида қатор қўшма лойиҳалар амалга оширилмоқда.

Шунингдек, ташриф доирасида қўшма бизнес форум муваффақиятли ўтказилиб, меҳнат миграцияси, дипломатик хизмат ва солиққа тортиш йўналишларида муҳим битимлар имзоланган.

Томонлар хавфсизлик соҳасидаги ҳамкорликка ҳам алоҳида эътибор қаратиб, терроризм, одам савдоси, наркотрафик ва кибержиноятчиликка қарши курашишда мунтазам ахборот алмашиш муҳимлигини таъкидлади.