Хабарингиз бор, Париж Олимпиадасида ўзбекистонлик Cитора Турдибекова Халқаро бокс ассоциацияси текширувларига кўра эркак деб топилган хитой тайпейликЛинь Юй-Тинга қарши жанг қилиб, мағлубиятга учраганди.

Халқаро бокс ассоциацияси (IBA) президенти Умар Кремлев ўзининг Инстаграм саҳифасида мазкур ҳолатни Халқаро Олимпия қўмитаси учун шармандалик эканлигини билдириб, эркак боксчиларга қарши рингга кўтарилган аёл боксчилар IBA томонидан 100 минг АҚШ доллари билан тақдирланишини айтди.

“IBA Олимпиадада адолатсизликка учраган боксчи қизларни олтин медални қўлга киритган спортчиларга бериладиган пул маблағлари миқдорида мукофотлайди.

Биз барчани ҳимоя қиламиз ва, албатта, гендер дискриминациясини ҳам. Ҳозир Олимпия ўйинларида содир бўлаётган воқеалар барча замонларнинг энг шармандали ҳолати.

Спортчилар ХОҚ раҳбариятининг беадаблигидан жабр кўрмоқда ва спортчилар гендер дискриминацияси ҳамда соғлом рақобатнинг йўқлиги туфайли фаолиятини якунлайди.

Биз спортчиларимизни қўллаб-қувватлашда давом этамиз ва бошқа халқаро ассоциациялар ҳам жим туришни тўхтатиб, биздан ўрнак олиш вақти келди!” – деб таъкидлаган Кремлев ўз саҳифасида.

Қайд этиш жоизки, Турдибековадан ташқари италиялик Анжела Карини ҳам рақиби генетик текширувда эркак киши эканлигини аниқланган жазоирлик Иман Хелифга қарши жангнинг 46-сониясида тўқнашувни давом эттиришдан бош тортганди.

• Бокс
• Олимпиада