Ўзбекистон парламент делегацияси 4 – 7 сентябрь кунлари Беларусда ташриф билан бўлади. Бу ҳақда Беларус парламенти юқори палатаси матбуот хизмати хабар берди.

Олий Мажлис Сенати Раиси Танзила Норбоева бошчилигидаги делегациянинг ташрифи Беларус томонининг таклифига биноан ташкил этилди.

Ташриф доирасида парламентлараро кун тартибидаги масалалар муҳокамаси билан бир қаторда биринчи Беларус-Ўзбекистон аёллар бизнес-форуми ташкил этилади.

Форум доирасида 5 сентябрь куни “Беларус ва Ўзбекистон ўртасида саноат соҳасида ҳамкорликни кенгайтириш”, “Енгил саноат соҳасида ҳамкорликнинг истиқболли йўналишлари”, “Шерикликни мустаҳкамлаш”, Беларус ва Ўзбекистон агросаноат мажмуалари, “Тиббиёт ва фармацевтика – Беларус Республикаси ва Ўзбекистон Республикаси ҳамкорлигини ривожлантиришнинг истиқболли йўналишлари”, “Фан ва таълим соҳасида шерикликни амалга ошириш”, “Маданият ва туризм” - ўзаро алоқалар салоҳияти" каби олтита секция мажлиси бўлиб ўтади.

6 сентябрь куни биринчи Беларус-Ўзбекистон аёллар бизнес форумининг асосий тадбири – “Аёллар бизнесда – Беларус ва Ўзбекистон ўртасидаги ишбилармонлик ҳамкорлигини ривожлантириш салоҳияти” мавзусидаги ялпи мажлис бўлиб ўтади.

• Беларусь
• Tanzila Narbayeva