Айни дақиқаларда Таиланд пойтахти Бангкок шаҳрида бокс бўйича нуфузли Thailand Open турнирининг финал жанглари ўтказилмоқда.

Бироз аввал мусобақанинг эркаклар ўртасидаги финал жанглари якунига етди. Ҳал қилувчи босқичга 5 нафар ўзбекистонлик чарм қўлқоп усталари етиб келганди. Улардан 3 нафари рақибларини енгиб, халқаро турнир чемпионига айланишди.

Шодиёржон Мелиқўзиев (-50 кг) иорданиялик Хутхаифа Эшишни 5:0, Ҳасанбой Дўсматовнинг укаси Фарёзбек Дўсматов (-55 кг) таиландлик Саравут Суктҳетни 4:1, Нусратбек Тоҳиров (-85 кг) эса яна бир мезбон боксчи Жаккапонг Ёмхотни 5:0 ҳисобида доғда қолдирди.

Финалга қадар етиб келган Муҳаммадазизбек Исмоилов (-70 кг) қозоғистонлик Торехан Сабирханга, Жавоҳир Абдураҳимов (-75 кг) эса ҳиндистонлик тажрибали Дипакка имкониятни бой бериб, кумуш медаль билан тақдирланди.

Шу тариқа, Ўзбекистон эркаклар терма жамоаси 3 та олтин, 2 та кумуш, 4 та бронза медаллари билан Thailand Open турнирини умумжамоа ҳисобида биринчи ўринда якунлади. Ҳиндистон иккинчи поғонадан жой олди.

• Бокс
• Tailand
• chempionat