Ўзбекистон фуқаролари Россия ва Украина ўртасидаги ҳарбий ҳаракатларда иштирок этмаслик ҳақида огоҳлантирилди.

Ташқи меҳнат миграцияси агентлиги Россиядаги ўзбекистонликларни ҳарбий ҳаракатларда иштирок этмасликка чақирди.

“Россия ҳудудида вақтинча меҳнат фаолиятини амалга ошираётган Ўзбекистон фуқароларидан Россия ва Украина ўртасидаги зиддиятли ҳудудларга жалб қилиш ҳақидаги даъватларга эргашмасликни, зиддиятли ҳудудларга бормасликни ва ҳарбий ҳаракатларда иштирок этмасликни сўраймиз”, дейилади хабарда.

Шунингдек, 7 декабрь куни Москва шаҳрининг Саларьево метроси ва Марьино аҳоли пункти оралиғида ҳаракатланувчи 420-автобусдаги мониторида урушга чақирув эълони берилган.

Эълонда “Россия Қуролли Кучларида шартнома бўйича ҳарбий хизматга кирганингизда, сиз Россия Федерацияси президенти фармонига мувофиқ, соддалаштирилган тартибда Россия фуқаролигини олишингиз мумкин”, – деб ёзилган.

Қайд этиш мумкин, Ўзбекистон Республикаси Жиноят кодексининг 154-1-моддасида (чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш) чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланиш уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланиши кўзда тутилган.

• Россия
• Украина
• Уруш