Euronews хабарига кўра, Афғонистондаги “Толибон” ҳаракати жамоат жойларида кийиниш қоидаларига амал қилмаган аёлларни ҳибсга олмоқда. БМТ эса аёлларнинг ҳуқуқлари поймол бўлаётганидан хавотир билдирди.

БМТ “Толибон”нинг аёлларни ҳибсга олишига шундай муносабат билдирди: “Ушбу ҳодисалар аёллар ва қизларни янада изоляциялашга, қўрқув муҳитини яратишга ва жамоатчилик ишончига путур етказишга хизмат қилади”.

БМТ “Толибон” ҳукуматини аёллар ва қизларнинг инсон ҳуқуқлари ва эркинликларини чекловчи, жумладан олтинчи синфдан кейинги таълимни тақиқловчи сиёсатни бекор қилишга чақирди. Ташкилотнинг Афғонистондаги миссияси 16 июлдан 19 июлгача Кобулда кўплаб аёллар ва қизларнинг ҳибсга олинганини маълум қилган. Хусусан, ҳибсга олинганлар ҳижоб ёки исломий рўмол ўраш қоидаларига риоя қилмагани очиқланган.

Афғонистоннинг ахлоқ ва эзгулик вазирлиги 2024 йил январь ойида Кобулда аёллар “ҳижобни тўғри киймагани” учун ҳибсга олингани ҳақида маълумот тарқатганди.

Вазирлик матбуот котиби Абдул Ғафар Фарук қанча аёл ҳибсга олинганини ва “нотўғри ҳижоб” қандай бўлишини изоҳламаган. Ўша пайтда БМТ миссияси аёлларга нисбатан зўравонлик қилиш ҳолатларини текшираётганини маълум қилган.

Маълумот учун, “Толибон” 2022 йил май ойида аёлларга фақат кўзларини кўрсатишга рухсат бериб, бошдан-оёқ паранжи кийишни талаб этувчи қарор чиқарганди. Кейинроқ эса аёлларга нафақат эркаклар, балки бошқа аёллар билан ҳам очиқчасига гаплашиш тақиқланганди.

“Толибон” ҳаракати 2021 йил август ойида АҚШ ва НАТО қўшинлари Афғонистонни тарк этганидан сўнг мамлакат назоратини қўлга киритган.

Россия 2025 йил 3 июлда биринчилардан бўлиб, Афғонистон Ислом Амирлигини расман тан олган.

• Афғонистон
• Tolibon