Бугун, 22 июнда ижтимоий тармоқларда Сурхондарё вилоятидаги “Тўполанг сув омбори”да кузатилган вазиятда шикастланган ва жабрланганлар мавжуд эмас.

“Ўзбекгидроэнерго” мутахассислари берган маълумотга кўра, сув омборида олиб борилган модернизация лойиҳаси доирасида синов ишлари олиб кетаётган босимли сув қувури тўсини шикастланиб, қўшимча 40 метр куб/дақ. ҳажмдаги сув ГЭС биноси орқали чиққан. Натижада умумий сув сарфи 160 метр куб/дақ. га кўтарилган ва у Тўполанг дарёсига йўналтирилган (шу кунга қадар сув омборининг сув чиқариш иншооти орқали дарёга 120 метр куб/дақ. миқдорида сув чиқарилаётган эди).

Таъкидланишича, 160 метр куб/дақ. сув сарфи миқдори Тўполанг дарёси ўзани учун мутлақо хавфсиз ҳисобланади (дарёнинг сув ўтказиш қобилияти 600 метр куб/дақ.). Ва бу дарёнинг пастки қисмда яшовчи аҳоли хонадонлари ва бошқа объектлар учун ҳеч қандай салбий оқибатларни келтириб чиқармайди.

Ушбу воқеа натижасида шикастланганлар ва жабр кўрганлар мавжуд эмас. Вазият тўлиқ назорат остига олинган. Айни вақтда барча кучлар сафарбар қилиниб, муаммо бартараф этилмоқда.

Эслатиб ўтамиз, аввалроқ, ушбу ҳолатда Тўполанг сув омбори тўғони билан боғлиқ бирор-бир муаммо кузатилмагани хабар қилинган эди.

https://uzgidro.uz/news/view/2879

• ФВВ
• Сурхондарё
• Сув омбори
• Тўполанг