Қосим-Жўмарт Тўқаев президентлик муддати тугашидан олдин ҳар қандай мукофотларни олишдан бош тортди. Бу ҳақда Қозоғистон президентининг Матбуот хизмати маълум қилди.

Худди шу сабабга кўра, у Россия томони бир кун аввал унга топширишни таклиф қилган “Александр Невский” орденини қабул қилишдан бош тортган. Бу ҳақда аввалроқ сиёсатшунос Ербол Эдилов ўзининг Телеграм-каналида ҳам маълум қилган эди.

Эдиловнинг ёзишича, худди шундай воқеа яқинда Бишкекка ташрифи чоғида ҳам содир бўлган. Яъни Қозоғистон президенти Қирғизистоннинг биринчи даражали олий давлат мукофоти – “Манас”дан бош тортган. Буни Токаевнинг матбуот котиби Руслан Желдибай ҳам тасдиқлаган.

Айрим манбаларнинг ёзишича, бу тартиб ҳам Қозоғистон, ҳам хорижий давлатлар орденларига тааллуқли.

Ҳозирча Тўқаевнинг “Александр Невский” орденини қабул қилмаганини Кремл тасдиқламаган. Бир кун олдин эса Тўқаев Санкт-Петербургдаги халқаро иқтисодий форумида иштирок этган ва ундан Донбасс республикаларини алоҳида мамлакат сифатида тан олиш имкониятлари ҳақида сўраганида Қозоғистон ДХР ва ЛХРни тан олмаслигини айтган эди. 

• Орден
• Қозоғистон
• Россия
• To'qayev