“Охирги йилларда янги ўқув йили бошланишидан олдин юртимизнинг турли ҳудудларидан таълим олиш учун келган талабалар ва уларнинг яқинлари фирибгарлар тузоғига тушаётганлик ҳолатлари кўпаймоқда.

Ушбу ҳолатлар асосан талабаларни арзон нархларда ижарага қўйиш каби вазиятларда учрамоқда. Фирибгарлар аслида ўзларига тегишли бўлмаган уйларнинг расмини интернетга жойлаб, гўёки “яшаш манзили”ни ижарага беришни таклиф қилмоқда. Албатта, бундай арзон нархлардаги таклифларни кўриб, харидор ҳам қизиқиш билдиради.

Фирибгарлар эса, уйни бошқа бировга бериб юбормасдан, сақлаб қўйиш эвазига олдиндан пул талаб қилади. Сўралган миқдордаги пул ҳисобга ўтгач, улар харидор билан алоқани узиб, уни барча саҳифаларини блоклайди. Натижада, алданган фуқароларга на уй, на яшаш манзили қолади.

Бу борада юртдошларимизга расман мурожаат қиламиз. Ҳеч қачон уйни ўзингиз кўрмасдан туриб, олдиндан тўловни амалга оширманг. Ижара шартномаси тузишни асло йоддан чиқарманг. Бу жараённи ҳам фақат ва фақат уйнинг эгаси билан гаплашгандан сўнг ҳал қилинг. Ўзингиз тўлиқ ишонч ҳосил қилмагунча шахсий маълумотларингизни бегоналарга асло юборманг.

Бу ҳақда барча яқинларингизни огоҳлантиринг. Қонуний йўл орқали ҳаракат қилиб, фирибгарлар имконият қолдирманг” – дейилади расмий хабарда.

• ИИББ
• Ogohlantirish
• Талабалар
• Тошкент