Шу кунларда Таиландда велотрек бўйича Осиё кубоги давом этмоқда.

Унда ҳамюртларимиз Таиланд, Малайзия, Қозоғистон, Жанубий Корея, Бирлашган Араб Амирликлари ва бошқа давлатлардан келган тажрибали велоспортчилар билан бир қаторда медаллар учун кураш олиб боришмоқда.

Кеча бўлиб ўтган мусобақанинг учинчи кунги баҳслари якунига кўра, ўзбекистонликлар яна 3та медални қўлга киритишди.

Жумладан, Маргарита Мисюрина Олимпия мусобақалари туркумига кирувчи энг мураккаб бўлган Омниум пойгасида бронза медалига сазовор бўлди.

Дмитрий Бочаров очколар бўйича гуруҳ пойгасида терма жамоамиз ғазнасига яна битта бронза медалини қўшиб қўйди.

Ниҳоят Янина Кускова эса очколар бўйича гуруҳ пойгасида кумуш медални қўлга киритди.

Яна бир ҳамюртимиз Нафосат Козиева ҳам очколар бўйича гуруҳ пойгасида қатнашди, бироқ унга совринли 3-ўрин учун бироз омад етишмади ва юртдошимиз 4-ўрин билан кифояланди.

Таъкидлаш жоиз, халқаро турнирлардаги муваффақиятлари натижасида велоспортчиларимиз қимматли рейтинг очколарини қўлга киритиб, 2024-йили Парижда бўлиб ўтадиган Олимпия ўйинлари лицензияларига тобора яқинлашмоқда.

• Осиё Чемпионати
• Ўзбекистон
• Tailand
• Велоспорт