Туркия Россия-Украина можаросини ҳал қилишга ҳар қандай ҳисса қўшишга тайёр.

Бу ҳақда, Туркия Миллий хавфсизлик кенгашининг президент Ражаб Тоййиб Эрдўғон раислигидаги йиғилиши якунлари бўйича баёнотида айтилади.

“Учрашув Туркия Россия Федерацияси ва Украина ўртасида доимий тинчлик ўрнатиш масъулиятини ўз зиммасига олишга ва бу жараёнга ҳар қандай ҳисса қўшишга тайёрлигини тасдиқлади”, — дейилади ҳужжатда.

Эслатиб ўтамиз, 23 июль куни Истанбулда Украинани тартибга солиш бўйича тўғридан-тўғри Россия-Украина музокараларининг учинчи раунди бўлиб ўтди. Учрашувдан олдин тўлиқ таркибда делегациялар раҳбарлари Владимир Мединский ва Рустем Умеров суҳбат ўтказдилар. Тўлиқ таркибдаги музокаралар тахминан 40 дақиқа давом этди, унда томонлар меморандумлар лойиҳаларида белгиланган позицияларни муҳокама қилдилар.

Учрашув якунида томонлар нафақат ҳарбийлар, балки тинч аҳоли вакилларини ҳам алмашишга келишиб олдилар. Россия Украинага сиёсий, ҳарбий ва гуманитар масалаларни ҳал қилиш учун учта онлайн ишчи гуруҳ тузишни таклиф қилди.

“Музокараларнинг тўртинчи раунди бўйича қарор янги келишувлар амалга оширилгандан сўнг қабул қилинади”, – деб хабар берди Мединский.

• Музокара
• Россия
• Туркия
• Украина