Бугун, 20 майдан бошлаб Аргентинада 20 ёшгача бўлган футболчилар ўртасидаги Жаҳон чемпионати старт олади. Мусобақанинг очилиш ўйинида амалдаги Осиё чемпиони Ўзбекистон мезбонларга қарши майдонга чиқади.
Мазкур учрашув, қолаверса, умумий мусобақадан аввал терма жамоамиз бош мураббийи Равшан Ҳайдаров ўз фикрларини билдирди.
Тайёргарлик ҳақида: Осиё чемпионатидан кейин яхши йиғинлар ўтказишга эришдик. Хусусан, Испаниядаги йиғинда Бразилия, Доминикан Республикаси ва Гибралтарга қарши учрашувлар ўтказдик. Кейинчалик режа асосида жисмоний тайёргарлик, тактик ишланмалар бўйича иш олиб бордик.
ЖЧ ташкилотчилиги ҳақида: ташкилотчилик ҳақида ижобий фикрдаман. Биз турган шаҳарча бироз кичикроқ, лекин энг асосийси майдонларнинг ҳолати яхши.
Таркиб ҳақида: Турдимуродовни янги деб бўлмайди, у кўплаб йиғинларимизда иштирок этган. Айни пайтда у ўзининг яхши формасида. Ҳужум чизиғини кучайтириш мақсадида уни жалб этганмиз. Аввалги йиғинларда барча футболчиларга имконият берилди, ким ўзини яхши кўрсатган бўлса, ўшани таркибга киритдик.
Аргентина ҳақида: Аргентина билан ўтган йили ҳам ўйнаганмиз. Уларни сўнгги ўйинларини таҳлил қилдик, кучли ва кучсиз томонларини ўргандик ва шунга яраша тайёргарлик олиб бормоқдамиз. Кучли рақиб, ном юзасидан ҳеч қандай босим йўқ.
Чунки биз нафақат Аргентина, балки Уругвай, Бразилия билан ҳам ўйнаб, етарлича тажриба тўпладик. Шу ўринда тайёргарлик жараёнида кучли рақиблар билан ўйинлар ташкил этгани учун раҳбариятга ва халқаро алоқалар бўлими мутахассисларига миннатдорчилик билдираман.
Жамоа олдига қўйилган мақсад ҳақида: аввал ҳам Жаҳон чемпионатларида иштирок этганмиз. Шу сабабли олдимизга олий мақсадни қўйганмиз, қолаверса, аввалги иштирокларимиздаги натижаларимизни яхшилашни ҳам мақсад қилганмиз.
Болаларнинг иштиёқи баланд, уларда ўзларига нисбатан ишонч бор. Ўйлайманки, Жаҳон чемпионатига тайёрмиз. Биз ҳозир олисдамиз, шу сабабли мухлисларимизнинг қўллаб-қувватлашларига эҳтиёж сезамиз. Халқимиз ойнаи жаҳон орқали бизни кўриб турганини, албатта, ҳис қиламиз, уларнинг дуолари биз учун муҳим.
Қайд этиш мумкин, учрашув 20 майдан 21 майга ўтар кечаси соат 02:00 да “Сантиаго дел Эстеро” стадионида бошланади. Беллашувни “Uzreport TV” телеканали орқали жонли томоша қилиш мумкин бўлади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!