Украина Хавфсизлик хизмати (УХХ) Херсон вокзалининг собиқ раҳбари Россия билан ҳамкорликда гумон қилиниб, ҳибсга олинганини маълум қилди.

“УХХ Россия кучларига ҳарбий поездларни Украина ҳудудига олиб ўтишда ёрдам берган собиқ “Херсон темир йўл вокзалининг бошлиғини” қўлга олди. Тўпланган далилларга асосланиб, хавфсизлик хизмати терговчилари жиноятчига "тажовузкор давлат билан шериклик" айбловини қўйишган”, – дейилади департаментнинг Теlegram' каналида.

Хавфсизлик хизмати ҳибсга олинган шахснинг исмини ошкор қилмади.

Қайд этилишича, аввалроқ у Херсон темир йўли унитар корхонаси таркибига кирувчи шаҳар вокзалининг станцияси бошлиғи лавозимига тайинланган. Бошқарма маълумотларига кўра, гумонланувчи ўз лавозимининг ваколатлари орқали “Россия ҳудудидан ҳарбий техника, қурол ва ўқ-дориларни тўсиқсиз олиб ўтишга” ҳисса қўшган.

Ҳозирда ушбу ҳолат бўйича қамоққа олиш тарзидаги эҳтиёт чорасини қўллаш масаласи ҳал қилинмоқда. Агар эркак ростан ҳам ушбу ишларда айбли деб топилса, барча мол-мулки мусодара қилиниб, 15 йилгача озодликдан маҳрум этилиши мумкин.

Маълумот учун, Херсон вилояти 2022 йил сентябрь ойида бўлиб ўтган референдум натижасида Россия Федерациясининг таъсис субъектига айланди. Шу билан бирга, Украина томони унинг қонунийлигини тан олмайди ва минтақа ҳудудини ўққа тутишда давом этмоқда. Херсон вилоятининг ўнг қирғоқ қисми, жумладан, Херсон шаҳри ноябрь ойидан бери Украина кучлари назоратида.

• Россия
• Украина