Мутахассислар “Жеймс Уэбб” телескопи томонидан суратга олинган галактикалар аслида мавжуд бўлмаслиги кераклигини таъкидламоқда.

Астрономлар Катта портлашдан кўп ўтмай пайдо бўлган бир нечта янги галактикаларни пайқашди. Уларнинг энг диққатга сазовор томони – бу уларнинг улкан массаси. Мавжуд барча моделларга кўра, бундай галактикалар коинотнинг дастлабки даврида фазода пайдо бўлиши мумкин эмас эди.

Ҳаммаси бўлиб олтита аномал катта галактикалар топилди. Улар кучли “Жеймс Уэбб” космик телескопи ёрдамида кузатилмоқда, деб ёзади “Nature” журнали.

Қайд этилишича, галактикаларнинг умумий оғирлиги Қуёш массасидан юзлаб миллиард марта катта. Шу билан бирга, галактикалар анча қадимий – улар тахминан 3,8 миллиард йил олдин содир бўлган Катта портлашдан кейин дарҳол пайдо бўлган.

Масса ва ёш ўртасидаги тафовут олимларни боши берк кўчага олиб боради.

“Биз топган олтита галактиканинг ёши 12 миллиард йилдан ошган. Катта портлашдан атиги 500-700 миллион йил ўтгач, улар бизнинг Қуёш массасидан 100 миллиард марта каттароқ ҳажмга етади. Бу ҳозирги моделлар доирасида мавжуд бўлиш учун жуда кўп”, – дейди Австралиянинг Свинберн технология университети мутахассислари.

Олимлар ушбу кашфиёт коинотдаги энг қадимги галактикалар қандай пайдо бўлганлиги ҳақидаги тушунчани ўзгартириши мумкин, дея хулоса қилмоқда. Улар аниқ қандай пайдо бўлганлигини аниқлаш учун топилган аномалияларни ўрганишни давом эттирмоқдалар. Тахминларга кўра, топилмалар аслида янги супермассив қора туйнукларнинг номаълум синфига тегишли.

• Galaktika
• Olimlar