Қозоғистон президенти Қосим-Жўмарт Тўқаев АҚШ президенти Доналд Трампга “Артемис II” космик миссияси муваффақиятли якунлангани муносабати билан табрик йўллади. 

Президент Тўқаев ўз табригида Америка илм-фани ютуқларини алоҳида таъкидлаб, улар жаҳон космонавтикаси ривожига сезиларли ҳисса қўшаётганини қайд этган.

Шунингдек, у бундай йирик лойиҳалар халқаро илмий ҳамкорликни мустаҳкамлашга хизмат қилиши ва бутун дунё бўйлаб ёш олимлар ҳамда муҳандисларни илҳомлантиришини айтган.

Эслатиб ўтамиз, жорий йилнинг 6 апрель куни “Артемис II” миссияси Orion космик кемасида экипаждаги тўрт нафар астронавт билан Ер юзидан тахминан 406–407 минг километр узоқликдаги масофага парвозни амалга оширган. Шу тариқа Apollo 13 миссияси томонидан 1970 йилда ўрнатилган рекорд янгиланган.

Янги миссиянинг аввалгидан асосий фарқи шундаки, космик кема Ойга қўнмасдан, унинг Ерга кўринмайдиган қисмини суратга олиб, уни айланиб ўтиши керак эди. НАСАъга кўра, парвоз кутилганидан ҳам муваффақиятлироқ тарзда амалга оширилган.

Хусусан, “Артемис II” миссияси астронавтлари Ойнинг орқа томонидан Ерга қаралганда сайёранинг ботиши қандай кўринишини акс эттирган фотосуратларни ҳам эълон қилган.

• Табрик
• Трамп