Шундай турдаги косметика воситалари борки, уларни ёзнинг жазирамасида ва қуёш нурлари тўғридан-тўғри тушадиган жойларга чиққанда ишлатиш зарарга хизмат қилади. Бугунги мақолада ёз мавсумида қандай турдаги косметикани фақат тунда ишлатиш ёки салқин кунлар келгунга қадар фойдаланмаслик кераклиги ҳақида сўзлашамиз.

Цитрус эфир мойлари
Цитрус ифорли эфир мойлари тетиклик беради, кайфиятни кўтаради, аммо ёз фаслида улардан кун бўйи фойдаланишдан эҳтиёт бўлинг. Цитрус мевалари терини патогенлардан ҳимоя қиладиган компонентларни ўз ичига олади, аммо уларни терига суртгандан сўнг ёзда кўчага чиқсангиз, мазкур фойдали элементлар фототоксик реакцияни келтириб чиқаради. Натижада терингизда қизариш, пигментация ва ҳатто куйиш каби ҳолатлар кузатилиши мумкин. Дерматолог ва косметологлар цитрус мевали эфир мойларини қуёшга чиқишдан камида бир сутка олдин, энг яхшиси кечаси, намлантирувчи тунги ниқоблар сифатида фойдаланишни маслаҳат беришади.

Антибактериал воситалар ва тозаловчи кислоталар
Умуман олганда, ёз фасли пилинг ва скатка каби чуқур тозалаш воситалари учун маъқул бўлмаган фасл. Бу мавсумда терингиз учун қила оладиган энг яхши нарса бу унга камида бир ой пилинг ва ниқоблардан дам бериш, терининг табиий pH балансини тиклаш, етарли миқдорда D витамини олишдир. Ёзги мавсумда кундалик терини парвариш қилишда антибактериал ва кислотали косметикалар, жумладан, салитсил ва гликолик кислоталарни чеклашнинг яна бир сабаби бор улар юзни ҳуснбузарлардан тозалаш билан бирга терини қуритиб юборади. Улар терининг ультрабинафша нурланишидан табиий ҳимоя қилувчи қатламини бузади ва зарарли қуёш нурларига таъсирчан бўлиб қолади.

Қуёшдан ҳимоя қилувчи спрейлар ва SPF 30 дан паст кремлар
Гўзаллик мутахассислари қуёшдан ҳимоя қилувчи спрейларни бутун тана учун, крем тузилишидаги SPF’ларни эса юз ва бўйин соҳаси учун қўллашни тавсия беради. Қуёшдан ҳимоя қилувчи бундай воситалар камида 30 даража SPF бўлиши лозим. SPF 30+ ва ундан юқори бўлган кремлар 95 фоиз тери ҳимоясини таъминлайди. SPF қанчалик юқори бўлса, шунча яхши.

Қуёшдан ҳимояловчи крем таркибига эътибор берсангиз, цинк оксиди унинг энг ишончли ва хавфсиз таркибий қисми бўлиб, косметик маҳсулотни сотиб олишдан олдин унинг мавжудлигига ишонч ҳосил қилишингиз керак.

• Гўзаллик
• саломатлик