Ёзнинг қизғин палласида ва жазирама об-ҳавода организмдаги сув миқдорини мўътадил даражада ушлаб туриш саломатлик учун жуда муҳимдир. Россиялик диетолог Василиса Понамарёва ёзда қандай маҳсулотларни истеъмол қилиш бўйича ўз тавсияларини берди.

Мутахассис организмда етарли сув миқдорини сақлаб қолиш, овқат ҳазм қилиш қулай кечишини таъминлашга ёрдам берадиган маҳсулотларни санаб ўтди.

Тарвуз
Тахминан 90 фоиз қисми сувдан иборат мазкур полиз экини ширин бўлса-да, чанқоқни қолдиради ва организмда сув балансини ушлаб туради. Шунингдек, тарвуз А, C витаминлари ва антиоксидантларга бой.

Бодринг
Витамин ва ўсимлик толаларига бой бодринг тетиклантирувчи таъсирга эга. Бодрингнинг калорияси паст бўлиб, таркибида К, C витаминлари ва турли минераллар мавжуд.

Цитрус мевалар
Апельсин, лимон, мандарин ва грейпфрут каби цитруслар C витамини кони бўлиб, улар иммунитетни мустаҳкамлашга ёрдам беради ва ёзнинг иссиқ кунларида энергия бахш этади.

Резаворлар
Қулупнай, қора олхўри, черника, қорағат ва малина резаворлари нафақат мазали, балки антиоксидантлар ва витаминларга ҳам эга мевалардир. Улар танадаги сув балансини мўътадил сақлашга ёрдам беради ва танани муҳим озиқ моддалар билан таъминлайди.

Сельдерей
Бу кўкат кўплаб ўсимлик толалари ва ҳазм қилишни енгиллаштирувчи хусусиятга эга.

Оқсилга бой маҳсулотлар
Ёғсиз мол ёки қўй гўшти, товуқ филеси, курка ва балиқ ошқозонда енгил ҳазм бўладиган ва оқсилга тўла маҳсулотлардир. Лосось, тунец каби балиқлар ҳам юрак фаолияти ва иммун тизими учун фойдали омега-3 ёғ кислоталарига тўйинган.

Сут маҳсулотлари
Йогурт, айниқса, грек йогурти, ҳазм қилишда ёрдам берадиган оқсил ва пробиотикларнинг манбаидир. Кефир ва қатиқ маҳсулотлари ичак микрофлорасини яхшилаш учун фойдалидир.

Тухум
Енгил ҳазм бўладиган оқсилга бой тухумни эрталаб нонушта учун сабзавотлар билан истеъмол қилиш тавсия этилади.

Шунингдек, иссиқ ҳаводан сақланиш учун қуйидаги қоидаларга риоя этинг:

- оғир ва ҳазм бўлиши қийин бўлган овқатлар — ёғли, куйиб пишган таомлардан тийилинг;
- ҳар 3-4 соатда кичик-кичик порция билан овқатланинг;
- чанқоқни ҳис қилмасангиз ҳам, мунтазам равишда сув ичиб туринг.

• Diyetolog
• Маслаҳат